Your browser doesn’t support HTML5
Сулейманов Юсуп. Ас цунна некъ лур бу
Сулейманов Юсуп
Ас цунна некъ лур бу
Эшамо язйинчу дахаран ворданахь
Тишвелларг мухха а новкъахь сайн Iотталахь,
ГIо гойтуш, айвелла, вошаллин куьг делла,
Хало а, гIайгIа а ас цуьнца йоькъур ю.
Буьрсачу къийсамехь ирс лардеш да воьжча,
Дисинчу буо-беро, де эшна, неI тоьхча,
Сихвелла гIаьттина, пхьор делла, хьаьстина,
Сайн хIусман и йовхо ас цунна дIалур ю.
Халкъан ирс лехарехь тешаме куьг делла,
Харц чехош, бакъонан урх лаца сихвелла,
ВогIучу цу новкъахь и дуьхьал Iотталахь,
Суо бердах водахь а, ас цунна некъ лур бу.
Сонтачу ойланца «со» аьлла гIаьттинарг,
Ша-шена ирс лехна, стогаллех къаьстинарг,
Сайн иллин тохамца кхиэл йина човхорца,
Нех санна карчийна, ас юьстах кхуссур ву.
Эсалчу Iаьнарца ламанаш хьаьстина,
Арешкахь, раьгIнашкахь беркатца яьржина,
Маьршачу боларехь и буьйса чекхъяьллехь,
Яааза вижнехь а, со вуьзна гIоттур ву.