Your browser doesn’t support HTML5
Муха го нохчийн эпсарна 111 хIаллакдина адам дIадолларх дерг
Орсийчоьнан тIеман ницкъаша, инзаре адам цец а доккхуш,мацах-мацах дайинчу адамийн цхьанаметта 111 деIахкийн чархаш махка а кхачийна дина Керлачу шеран «балане совгIат» тахана а дийцаре дечуьра охьадуьллуш дац юкъараллехь.
Церан хьокъехь Iедалан хьостанаша деш долчу дIахьедарша хьаам ца бо могIарерчу нахан. Стенна аьлча цара баххане ца боху, бехк боцуш маьрша бахархой Iожалле кхачийнарш лаха а беза,кхела хьалха хIиттош царна дан хьакъдоллу таIзар дан а деза.
Официалан кхайкхийнарг ду тIом, бехк-гуьнахь а доцчеран синош дохуш боьху хIума хилар а,лабараторехь даIахкийн зенаш дина хиларца доьзна,хIора а велларг мила, мичара ву а хиина, церан чархаш гергарчара хьаам а хуьлуш, лаьтте ерзор хилар а. Бахархойн дог-ойла,кхетам карзахбоккхуш,церан хьокъехь коьртах мел дуьйлу хеттарш жоьпаша дуьсуш ду.
Царалахь мехалниг ду,хIун-мила а ду хууш, стаг кхиъал йолчу ехачу хенахь,чуьра гергарчийн самалха ца далийта Iалашо лаьцча санна, хьулам а бина стенна латтийна,хьан латтийна церан даьIахкаш?
И хаттар хIетал-метал ду могIарерчу нахана хьовх,дуккха а шерашкахь кхузахь къепе латтош гIуллакх деш болчу цхьаболчу эпсаршна а.Царех ву со цIарца вийца хIуттуш воцу, Сайди аьлла хийцина цIе тиллина эпсар. МогIаречу салташа муха кхетадо оццул хенахь мичахь бу а ца хоуьйтуш беллачеран даьIашкаш латтор?
Сайди: «Сан хьекъалехь и муха хила деза, кхеталуш дац! Уьш мичара бигина хилла, маца бигина латтийна? ТIеман нах ма бац уьш. Уьш маьрша нах ма бу лецна дIа а бигна хIаллакбина. И гIуллакх талла а теллина, хьан бигна, хIун ду,талла а теллина таIзар дан дезаш хIума ду-кх иза,бехкениг милла велахь а».
Маршо Радио: Адам цецдуьйлург хIун ду. ХIан бигна,доьза байина. Уьш байина дIабаьхна хилча оццул хан яллалц уьш стенна латтийна,гергарниш бIарз а бина, церна са а дууш.Цаьрга сатуьйсу хийла да велла-кх! Уьш стенна латтийна кхета ца ло-кх нахе? Эпсаршлахь хIун дуьйцу?
Сайди: «Муьлххачу а лартIахь волучо лур долу хаттар ду-кх иза, стенна латтийна хIинццалц къайле а йина? Мел хан яьлла? Уьш латтийнехь бехкенаш жоьпе беха богIу. Адам гIаьттина а жоп деха деза. Бехке бу аьлла, сацам ца хилча, царна кхел йойла а ма дац. ТIаьхьакхиа лаахь, чехка тIаьхьакхуьур бу. Къамел а дац. ТIеман дакъош мичахь, маца лаьттина хууш ма ду. Бух боцуш Iедалан хIумма а дан а ма дац.
Омранаташ ю, эскарш ду, муьлш, мичахь, мича сохьтехь, муьлхачу дийнахь лаьттина - дерриге а хууш ду. Бала кхача беза. Ур-атталла муьлха пост мичахь лаьттина гойтуш кехаташ, баххаш ма ду. Делан къинхетамца цара и чархаш схьаелла. ХIинца зераш дичхьана, уьш муьлш хилла хуур ду, тIаккха мичара бигина гучу а дер ду, цул тIаьхьа хаа луучунна уьш хьан бигина а хуур ду-кх».
Нохчийчу схьакхачийначу адамийн чархех къамел диначу эпсарна Сайдина хетарехь Оьрсийчоьнан тIеман буьйранчаша кхин дIа йолчу ханна а маьршачу нахана тIехь ишта эрадоккхур дац аьлла, чIагIо ян хала ду.
Цундела хета цунна тIаьхьалонна вуно мехала а,ца дича ца долуш,куьгг бехкениш муьлш бу а хиъна,кхечу пачхьалкхашкахь санна, кхела хьалха хIиттор. Сайдина моттарехь тIаккхий бен дегайовхо хир яц,кхин ишта доза доцу къизалла,аккхалла къомана тIехь лелор яц аьлла.
Бакъду, тахана тергаллучу хьолаца Оьрсийчохь, тIамах бахьана а дина,шайггара кхел еш, адамаш дайина эскархой а,царна и магийтина буьйранчаш а лохур а бу,жоьпе ийзор бу бохучух Сайди ша а ву кIезиг тешаш.