Францхойн Danone компанин дакъа Росимуществон урхалле далар йухадаьккхина Путин Владимира, йаздо Маршо Радион оьрсийн сервисо. Цунах аьлла ду Оьрсийчоьнан президентан омрана тIехь.
Сацам баран бахьанаш документехь билгалдаьхна дац. Аьтто болчу эцархочунна бизнес йухкуш бартбаран барамца а, компанино дуьненайукъарчу инвестицин арбитраже иск кховдорна кхерарца а дузу и юристаша, йаздо "Коммерсанто".
Оьрсийчоьнан структурера компанин арахьара дакъа стохка товбеца- баттахь Росимущество урхаллига ханна дIаделлера. Цул а хьалха Danone дIакхайкхийра Оьрсийчуьра арадовлу шаьш, инвестицин проекташ а йерзош аьлла.
Росимущество урхалле дIайеллера "Данон Россия" компанин 83 миллиард акцеш а, "Данон Трейдан" 85 эзар акци а. Цул тIаьхьа Оьрсийчуьра заводийн куьйгалла дан хIоттийра Нохчийчоьнан вице-премьер Закриев Якъуб – Нохчийчоьнан куьйгалхочун Кадыров Рамзанан йишин Кадырова Зулайн кIант.
Financial Times ресурсан хаамашца, компани дагахь хиллера Оьрсийчуьра шен бизнес ГIезалойчуьра "Вамин" компанина йохка. 29 шо долчу Мингазов Минтимиран долахь йу и.
- Danone – шурин сурсаташ а, кхинйолу йуург а арахоьцу францхойн гоьйаьлла компани йу. Дуьненан 140 сов пачхьалкхашкахь болх беш йу и. Оьрсийчу кхаьчнера Danone 1992-чу шарахь.
- 2022-чу шеран чиллан-баттахь Оьрсийчоьно Украинана дуьхьал тIом болийначул тIаьхьа 1200 сов организацино Оьрсийчуьра шайн болх сацийра, царех 500 сов пачхьалкхера арайелира. "Важные истории" ресурсан лараршца, йу и тIом балале Оьрсийчохь болх беш хилла 20 процент арахьара компанеш.
- Компанийн активаш ханна Росимущество урхалле дIайалар национализаци йар лору. Оьрсийчоьнан Iедалхошна иштта ца хетара и. Цара кхетадо цунах, формалехь активийн долахой хьалхалера бу, амма цу активех пайдаэца церан йиш йац аьлла.
- Тоххара Закриев Якъуб вице-премьер а, Нохчийчуьра йуьртбахаман министр а вара. Стохка лахьан-баттахь Американ Цхьаьнатоьхначу Штаташа цунна а, цуьнан дена Закриев Салманна а – Нохчийчоьнан парламентан спикеран хьалхара гIовс ву иза -дуьхьал санкцеш йехира.