Росфинмониторинган экстремистийн, террорхойн тептарехь нисвелла Краснодар-махкарчу Полтавская станицера дешархо Казанцев Максим. Цуьнан 15 шо ду - иза реестрерчу нахах уггаре къонаверг ву.
Казанцев цу экстремистийн, террорхойн могIаре йазваран бахьана хууш дац. Кавказ. Реалии редакцин аьтто ца белира, цу цIарца боьзна кхелийн сацамаш карон. Хаамийн гIирсашлахь цхьамма а хьахийна а йац и цIе.
Казанцев экстремистийн, террорхойн реестрехь хенаца уггаре жиманиг ву. Карарчу хенахь цу реестрехь лаьтташ ву 29 кхиазхо. Уьш дуьненчу бевлла 2005-2007-чу шерашна йуккъехь.
- Краснодар-мехкан Темрюкский кIоштан кхело бехке лерира 50 шо долу меттигера вахархо Каталевский Александр. Цунна бехке диллинарг дара экстремизман чулацам болу кхайкхамаш бар. Арахь йаккха ши шо хан туьйхира Каталевскийна, нуьцкъала психиатрин дарба дан а хьажийра. Цо социал-машанашкахь йина комментареш кхело къаьмнашлахь питанаш даржочарех лерина.
- 2022-чу шеран лахьан-баттахь Росфинмониторинган экстремистийн, террорхойн тептарехь нисвелла экс-кхелахочун Янгулбаев Сайдин кIант Янгулбаев БойсагIар. Нохчийн жигархойн ЯнгулбаевгIеран Абубакаран, ИбрахIиман жимахволу ваша. И сацам а иштта цхьа а бахьана билгал ца доккхуш, битира.
- Стигалкъекъа-баттахь украинхойн талламо гIарадаьхначу хааршца, Нохчийчуьра Украинерчу тIаме хьовсийначу кадыровхойн декъехь а, лаамернаш олучаьрца а Росфинмониторинго хьалхо террорхойн, экстремистийн тептаре йазбиначарех 14 стаг хилла. Царех виъ цу тептарехь хIинца а ву. Кхин цхьаъ гIадужу-баттахь тептарера дIаваьккхина.