ТIеман гIуллакхна кIелхьаравала гIоьртина аьлла, бехкевинчу контрактхочун Носов Даниилан хьокъехь бехктакхаман гIуллакх листина Соьлжа-ГIалин тIеман гарнизонан кхело. Прокуратуро дIахьедина, Украинехь волчу заманчохь куьйгахь граната эккхийтина хилла цо, тIом бан мага а ца вина, ша цIа вахийтархьама.
Бехкбуьллучийн версица, охан-беттан 12-чохь Украинан Запорожскан кIоштахь Оьрсийчоьнан эскархойн могIарехь волчу Носов Даниила РГД-5 граната эккхийтинера шен буйнахь, вон лазийнера иза. Кавказ.Реалиин хьасто хаамбарца, аьтту куьг ду эскархочун лазийнарг. Цул тIаьхьа тIемаш бечуьра араваьккхинера иза.
Соьлжа-ГIаларчу тIеман гарнизонан кхеле кхачийнера гезгамашин-беттан 13-чохь цуьнан бехкзуламан гIуллакх. Керла тоьшаллаш эшарна гезгамашин-беттан 29-чохь хир ю аьлла суьдхойн кхеташо дIатоьттура, ткъа гIадужу-беттан 6-чохь цхьаъ бен ца хиллачу кхеташонехь суьдхочо Шалаев Артема таIзар кхайкхийра.
ВорхI шаре кхаччалц хан кхачайора Носов Даниилна, кхело юкъарчу рожехь йолчу колонихь даккха ши шо хан тоьхна цунна. Кхелан кхеташонехь дакъалоцуш бара цуьнца цхьаьна эскаран гIуллакхехь хилларш а.
- Хьалхо дIахьедира, Украинехь Оьрсийчоьнан эскархошна а, кадыровхошна а юкъахь девнаш дийларх. Херсонан кIоштан дозана тIехь алсамдуьйлура кега-мерса хIуманашна тIехула Оьрсийчоьнан дакъошлахь вовшашца хуьлу конфликташ, хаамбира Украинан президентан офисан куьйгалхочун хьехамчас Подоляк Михаила твиттерехь. Цо бахарехь, бахьана дара, шаьш къола дина хIума дIасайекъарехь, цу юкъахь дакъалоцуш хиллера кадыровцаш а.
- Сочи гIалара гарнизонан тIеман кхело бехкевира контрактхо Кольчугин Илья уставехь язйина юкъаметтигаш талхорна. Эскаран гIуллакх дечу пхеа салтишкахула хаа гIоьртинера иза, тIеман министраллица контракт дан дагахь буй уьш, цара дуьхьало йича йиттинера царна.
- Кавказ.Реалиино бIаьста яздира, Къилбан а, Къилбаседа Кавказан а регионашкара салтий кест-кеста Украинехь тIемаш бан дуьхьалбовлий, цIа оьхуш хиларх. Оьрсийчохь оцу тIехула дIабоху уьш "тIемаш бан пайден бац" олий. Оцу хьолехь нисбелира, масала, ГIебарта-Балкхаройчуьра 115 Росгвардин эскархо а, Буьри-ГIалара 50 контрактхо а, Краснодар-мехкан ОМОН-н "Пластун" ротера эскархой а. Къилба ХIирийчуьра Оьрсийчоьнан базера кхин а 300 гергга эскархойн аьтто белира шайн лаамехь Украинера юхабахкарна таIзар ца деш бовла.