Школана тIелеттачу ГIалгIайчуьра вахархочунна Могушков Мохьаммадна Францихь бехкаш дехкина терроран гIуллакхца доьзна стаг верна а, вен кIелойарна а, террорхойн йукъараллехь дакъалацарна а. Цунах лаьцна хаамбина францхойн BFMTV телеканало.
Оццу кепарчу Iедалан къепашкахула бехкевина Могушковн жимахволу ваша а. Зулам гушшехь хIуммаъ ца деш Iийна церан шича а озийна бехке.
Оцу гIуллакхца боьзна берриш а лаьцна битина. Таллам болийна. ГIирсан хаамашца, пIераскан дийнахь лаьцча дуьйна схьа Могушковс мукIарло дина дац.
20 шо долчу Могушков Мохьаммада ша Францера школана тIелатале хьалха видео дIайазйина хилла, ша даIишан цIарах лелаш ву аьлла. Иза лаьцначул тIаьхьа цуьнан телефон чохь карийна видеош а, аудиош а, цу тIехь Могушковс ваIда до "Исламан пачхьалкхана" тешаме хила. Талламхой тешна бу, хьалххе цхьа ойла а йина, дина зулам ду аьлла.
Иштта "Radio France" ресурсо билгалдаьккхина, шен видео тIехь Могушковс "ладам боцуш" къадийна хилар Израилехь гIадужу-беттан 7-чохь ХАМАС-а динчу тIелатарх.
Школана дина тIелатар бахьана долуш мел лахара а лаьцна полицихь латтош ву 10 стаг: ша Могушков а, цуьнан ши ваша, нана, йиша, деваша а, иштта, хетарехь Беларусера волу кхин а ши стаг. ТIелеттачун зIе хилла боху цаьрца. Нана а, йиша а тIаьхьо маьрша йитира.
Могушковн йишас дийцина цунах лаьцна "къиза, радикалан хьежамаш" болуш вара иза аьлла. "Боьха хIума" йара иза аьлла цо, шен вашас динарг йемалдеш. Цо дийцарехь, цуьнца а, ненаца а гIело латтош хилла вашас, тIе куьйг хьош а хилла.
Иштта Могушковас дIахьедина талламхошка, шен вешин Iалашонех шена хууш хIуммаъ дацара аьлла.
20 шо долу Могушков кхоьлина хуьлура даим а, гуттар а дас ницкъбеш хиллера цунна доьзалехь. 2018-чу шарахь Францира араваьккхира церан да, билгалдоккху Le Figaro гIирсо. Цуьнан воккхаха волу ваша лецира 2017-чу шарахь, цунна чохь даккха пхи шо туьйхира, террорхойн йукъараллехь дакъалацарна. "Исламан пачхьалкх" олучу тобанна пропаганда йеш хилера цо аьлла кхело.
- Францихь Аррас гIаларчу школана тIелеттера 20 шо долчу ГIалгIайчуьра схьаваьлла вахархо гIаджу-беттан 13-чохь. Цхьа хьехархо вийра цо, шинна чевнаш йира, йаздо BFM TV, Le Figaro хьасташа. Бехкево – оцу школан хилла дешархо, шайн хьасташна тIетевжина хаамбира BFMTV телеканало. Ша тIелетачу заманчохь "АллахIу Акбар" бохуш мохь биттинера цо.
- Школана тIелатар динчул тIаьхьа Францино пачхьалкхера арабаха тарло радикалан хьежамашца бу аьлла, шайн тептаршкахь хилла нах. Бу царлахь нохчий а, кавказхой а. Цунах лаьцна BMF TV каналан эфирехь дIахьедина чоьхьарчу гIуллакхийн министро Дарманен Жеральда.