Страсбургерчу Европан Кхеташонна хьалха пикет хIоттийнера нохчийн диаспоран векалша, Оьрсийчоьнан дехарца Нохчийчуьра яхархочунна Гериханова Аминина Румынера депортаци ярна дуьхьал.
Эха сахьтехь гергга лаьттира митинг, цул тIаьхьа цуьнан декъашхой, полици улло яьлла, Страсбургерчу Румынин векалте баьхкира, дийцина "Европерчу нохчийн Ассамблейн" пресс-секретаро Албаков Шемала.
"Консуло тIеийцира тхо. Тхоьга ла а дуьйгIира цо, резолюци дIаийцира, Румынин МИД-е дIакхачор ю аьлла", - дийцира Албаковс. Цул тIаьхьа митинг кхин дIа яьхьнера цара.
"Шенгенан информацин системин (SIS) Iаьржачу тептаре язйина Амина Германино, Интерполехула Оьрсийчоьно яржийначу харц информацин буха тIехь. Цул тIаьхьа Амина кхераме лерина Шенгенан бертан пачхьалкхаша-декъашхоша, Румынино а цхьаьна", - аьлла ду резолюци тIехь.
Жигархоша чуделлачу документа тIехь хаамбо, 2000-чу шарахь Аминин нанна федералаша герз тоьхна хиларх Алды эвлахь, ткъа Гериханова Аминина экстрадици яхь, цунна тIехь Iазапаш хьегийта а, еххачу ханна набахти хьажо а тарло.
- 36 шо долу Нохчийчуьра Гериханова Амина лецира Зазадокху-беттан I3-чохь шен жимачу бераца Румыница долчу дозанехь Украинера араяла гIертачу хенахь. Оьрсийчоьнан дехарца Интерполон лехамашка еллера иза – мухIажар бехкейо Шеман дозана тIехь боьлхучу тIемашкахь дакъалацарна. Пхи шо гергга хьалха Нохчийчуьра дIаяхара Гериханова, цул тIаьхьа Киевехь ехира иза. Румынехь иза дIалецира, цуьнан кIант берийн цIийне хьажийра – тIаьхьо цуьнан гергарчу стага дIавигира иза цигара.
- Хьалхо Румынин Сучава гIаларчу кхело дуьхьалойира Гериханована тховкIело яла – мехкан миграцин хьукмато бинчу сацамна цо дуьхьал кховдийна латкъам а юхатеттира. И сацам аппеляцин инстанцехь къовсуш ю Гериханова.
- Марсхьокху-баттахь Гериханова Аминас хаамбинера «Вайфонде», гезгамашин-беттан 7-чу буса румынхойн кхелан сацамца, ша маьршаяккхаре хьоьжуш ю ша, хIунда аьлча, Iедалхойн бакъо яц 180 дийнал сов ша лаьцна латтон аьлла.