"ГIебарта-Балкхаройчоьнна гIуллакхаш дарна" аьлла, регионан лаккхара совгIат дина Нохчийчоьнан урхалхочун воIана Кадыров Адамна. Мехкан куьйгалхочо Коков Казбека дIакховдийна совгIат.
Орден схьаэца Нальчике вахара 15 шо долу Кадыров Нохчийчоьнан цIарах Оьрсийчоьнан парламентехь депутат волчу Делимханов Адамца цхьаьана. Хьалхо зорбанашкахь йаздора, ГIебарта-Балкхаройчоьнан Iедалхой дуьхьал хиларх Кадыровн кIантана совгIат дан.
Шайн телеграм-каналашкахь Кадыров Рамзана а, Коков Казбека а хаамбина совгIат дарх лаьцна. Нохчийчоьнан куьйгалхочо чIагIдо, омраца а догIуш, "къаьмнашна а, динашна а йукъара машар а, барт а чIагIбеш дакъалацарна" йелла йу орден бохуш. Коковс билгалдаьккхира "дуккха а халкъаш, динан векалш бехачу пачхьалкхехь массо а бахархошна девзаш, тIеэца тарлун ламастин мехаллаш лардан а, царна тIехIиттан а" дезаш хилар.
Хьалхо "Верстка" сайто хаамбира, ГIебарта-Балкхаройчоьнан а, Адыгейн а Iедалхой реза цахиларх Кадыровна къоман совгIаташ дан - оцу кепара дехар кхаьчнера цаьрга, журналистийн хаамашца, Кадыров Рамзанан администарцин векалшкара.
ГIебарта-Балкхаройчоьнан орден – пхоьалгIа совгIат ду Кадыровн, КъорIан дагийна аьлла, Соьлжа-гIаларчу СИЗОхь лаьцна латточу Журавель Никитина йетташ видео йаьржинчул тIаьхьа.
ГIадужу-беттан 4-чохь кхиазхочунна Нохчийчоьнан Турпалхочун седа белира.
ШолгIа мехаллин ГIезалойчоьнан "Дуслык" орден йелира – "къаьмнашна а, динашна а йукъара машар а, барт а чIагIбеш дакъалацарна". ГIезалойчоьнан куьйгалхо Минниханов Рустам ша веанера Нохчийчу гIадужу-беттан 24-чохь Кадыровна совгIат дала.
ГIадужу-беттан 25-чохь "Кхарачой-Чергазийчоьнна динчу гIуллакхашна" орден йелла – регионан лакхара совгIат ду иза. Цуьнца совгIат динера "къаьмнашна а, динашна а йукъара машар а, барт а кхиорна а, исламан ламастин мехаллаш чIагIйарна" а аьлла.
Лахьан-беттан 5-чохь Кадыров Адамна кхин а цхьаъ Кхарачой-Чергазийчоьнан совгIат делира – "Умматана хьалха гIуллакъаш дарна" I-чу бараман орден.
• КъорIан дагийна аьллачу шеконашца Журавель Никита лецира стигалкъекъа-беттан 21-хь. Талламан комитетан куьйгалхочун Бастрыкин Александран тIедилларца, гIуллакх билггал Нохчийчу дIаделира, шаьш "зен хилларш ду аьлла, дуккхаъчу Нохчийчуьра бахархоша дехарш дарна" аьлла, кхетийра цо цунах.
• Соьлжа-ГIаларчу СИЗО-хь Журавель Никитина йиттира 15 шо долчу республикан куьйгалхочун кIанта Кадыров Адама. Журавеля ша дIахьедира цунах лаьцна. ГIалужу-беттан 25-чохь Нохчийчоьнан куьйгалхочун телеграм-канале хIоттийра Журавельна йетташ, дIайазйина видео. Шен кIанта динчух дозалла до ша аьлла, дIахьедира Кадыровс Рамзана.
• Нохчийчуьрчу полицино дуьхьало йира бехкзуламан гIуллакх доло – Нохчийчоьнан куьйгалхочун 15 шо долукIант жоьпалле озон йиш йац, иза дукха жима хиларна аьлла.