Республикера ницкъаллин дакъойн командирашна Нохчийчоьнан куьйгалхочо Кадыров Рамзана тIедиллина мичча хенахь а тIамана кийча хила аьлла. И дIахьедар дина цо, Украинехьа тIемаш бечу йозуш йоцчу Ичкерин агIончех долу дакъош Оьрсийчоьнан дозана тIе кхерста дуьйладеллачу йукъанна.
Тактикан тIеман кечамна а Iамабе эскархой аьлла, командирашна тIедожийна Кадыровс, "мичча хенахь а пачхьалкхана хIоьттина кхерам бухатоха" кийча хилийта. Нохчийчоьнан урхалхочун телеграм-каналехь зорбане хIоттийна и хаам.
Йозуш йоцчу Ичкерин агIончаша Белгородан кIоштахь йинчу диверсех масех хаам бинчул тIаьхьа сацам тIеэцна Нохчийчохь тIамана кийча хила деза аьлла. Зазадокху-беттан 17-чохь Горьковский эвлан администраци схьайаккхарх дIахьедира "Сибиран батальоно", цу йукъахь тIемаш беш а бу нохчий.
Нохчийн Iедалхоша и бакъ ца до, хьалхо дIайаьхнера бохучу кIошташкахь кадыровхошца йина видеош йаржош. Ша Кадыров Рамзана оцу хьолах лаьцна аьлла дош дац.
Зазадокху-беттан 15-чохь нохчийн ша Къаьстина леррина Iалашонаш кхочушйечу батальонан (ОБОН) командиро Ажиев Рустама дIакхайкхийра, Оьрсийчохь диверсин болх болорах. Цо бахарехь, диверсеш совцор йац цара, "Нохчийн Ичкерия республикан йозуш йоцу территореш" цара маьрша йаххалц.
- Марсхьокху-баттахь аьтто хилира цуьнан тобанан Белгородан кIошта а кхаьчна, мел лахара а, кира кхоьхьу тIеман цхьа машен хIаллакйан. Ажиевн а, "Ансаран" а тоба "Оьрсийн лаамхойн корпусца" цхьаьна ВСУ-н интернационалан легионна йукъа йогIуш йу.
- Карарчу хенахь къаьстина, Украинин эскарехьа тIом беш нохчийн йалх батальон хиларх. Иза Шайх Мансуран цIарах батальон (буьйранча ЧIебарло Муслим); Дудаев Джохаран цIарах батальон (буьйранча Осмаев Адам, батальонца жигара "Адаман тоба" йу); ОБОН ВС ЧРИ (леринчу гIуллакхашна къастийна батальон, буьйранча - Ажиев Рустам); Шалена Зграя "Хьере арданг"( Абдурзаков Казбек); SOG (Леррина оператив тоба); Гелаев Хьамзатан цIарах батальон.