Культурин министр, мехкан урхалхочун 24 шо долу йоккхаха йолу йоI Кадырова Iайшат премьер министран гIовс хIоттийна регионехь. ДIахьедина, социалан блоках цо жоп лур ду аьлла.
Министрийн кабинетан шуьйрачу кхеташонехь бина сацам Кадырова дарже хIоттош, премьер-министран Хучиев Муслиман хьехарца. Ткъа Кадыров Рамзан, цуьнан телеграм-каналехь йаздарца, тIетайна цуьнан инициативана.
Культурин министр хир ву Дадаев Муса, 30 сов шерашкахь Кадыровн бIанакъост волу. Лахьан-баттахь спортан министран дарже хIоттийнера иза, ткъа стохка мангал-баттахь культурина а, туризмана а, спортана а, кегийрхойн гIуллакхашна а тIехь Iуналла ден вице-премьер хIоттинера иза.
- Кху деношкахь Нохчийчохь зударийн бакъонаш ларйийр йолу, церан йукъараллехь дакъалацар лакхадоккхуш кхеташо тIечIагIйина. Оцу кхеташонан бархI декъашхошлахь Кадырова цхьа зуда йу.
- Гезгамашин-баттахь II-чу бараман орденан мидал йелира Кадырова Iайшатана "Даймахкана гIуллакхаш дарна" аьлла.
- Iайшат – Кадыров Рамзанан йоккхаха йолу йоI йу. Шен 17 шо долчу заманчохь Firdaws модин цIийнан директор хилира цунах. 2009-чу шарахь цуьнан нанас Кадырова Меднис схьдиллина дара и. 2020-чу шарахь цкъа йуьхьнаца регионан культурин министран хьалхарчу гIовсан дарже хIоттийра иза, ткъа 2021-чу шарахь 22 шо долуш министр хилира цунах. Цуьнан хIусамда Мацуев Висхан кху шеран товбеца-баттахь республикин вице-премьер а, йуьртбахаман министр а хIоттийра.
- Кадырова Iайшат "культурин хьакъйолу белхахо" йу, иштта мидалш йу цуьнан "Адамийн бакъонаш Iалашйарна" а, "Нохчийчоьнна хьалха декхарш кхочушдарна", регион "кхиорехь дакъа лацарна" а совгIат дира мехкан 100 шо кхочуш, ДоттагIаллин орден йелира "ДНР" аьлла дIакхайкхийначу мехкан цIарах, иштта Нохчийчоьнан лаккхара совгIат а – Кадыровн орден.
- Американ Цхьаьнатоьхначу Штатийн а, Евробертан а, Японин а санкцийн тептаршкахь йу Кадырова Iайшат. Цул совнах Американ санкцешна йукъатоьхна Кадырова Iайшатан Firdaws модин цIа а.
- Нохчийчохь иттаннашкахь мехкан урхалхочун гергарнаш хIиттабо регионехь куьйгаллин лаккхарчу даржашка. Шен цIийнах болу нах хьалхатеттарехь, къийса хIума ца го цунна шена. "Сайн тешам берриг хIоттаво", - элира Кадыровс.
- Пачхьалкхан даржашкахь ду цуьнан бераш, йижарий, невцарий, йиша-вешин доьзалхой, шичой, маьхчой. Кавказ.Реалиин редакцино вовшахтуьйхира республикан пачхьалкхан структурашкахь белхаш бечу КадыровгIеран цIийнах болчех дуьззина тептар.