Your browser doesn’t support HTML5
Кест-кеста нисло Нохчийчохь чари чохь луьйчуш садукъделла баларш
Къаьсттина дукха нисло оьрсашлахь "угар" олучу садукъдаларца доьзна нах балар. Юкъараллехь гIар а долуш, кху деношкахь цу кепара ши сингаттам иккхина Нохчийчохь. Масех де хьалха 13 шо долу кIант кхелхина Гуьмс кIоштан Илсхана эвлара.
Оццу хенахь бохург санна 18 шо долу кIант а велла луьйчуш Iашшехь Теркйист кIоштан Ломаз юьртара. Къамеле ваьлча, бахархоша карладоху шайн юьртахь нисьелла цу могIарера Iожаллаш.
Садукъдаларца доьзна юьртахь нисделла баларш бахьанехь дагалецамаш юьйлу Новр кIоштара Марет.
Марет: «Тхан юьртахь, суна дага а догIуш,садукъделла баларш маситта а нисделла-кх. Ледарлонна, кхерамазалла лар цаярна нислуш баларш ма дуй уьш, ма-дарра аьлча. Оьрсий бехачу меттигашкахь цIе яго пеш а, колонка а чохь ца юьту, арайоккху.
Газ чухеца баьхкинчара цхьа ледарло тIех ца йолуьйту, гIалаташ дIа ца даьхча куьг а яздина, пурба а ца ло газ чухеца. Нохчашна юккъехь могуьйту… ТIаьхьалонан ойла ца йо.
Суна а дага а догIуш, 13-14 шо долу кIант вела са а дукъделла, кхиъна яьлла йоI елира, гIеметта хIоьттина стаг веллира…. Дукха нисъелла бохаме меттигаш. Ас сайн аьллар хилча, телевизор чухула хьехамаш бойтуш, кхайкхамаш бойту хьожийла дойтур дар-кх».
МЧС олучу орцаллин министараллехь капитан а волуш эпсар ву Магамадов Iела. Цо цхьа могIа бахьанаш дагардира цIано ечу чохь хеназа юх-юха а нислучу бохамашца доьзна.
Iела: «Уггаре хьалха бехке хаза бакъо а йолуш, Iедалера даьккхина кехат цахилар а ду. Арахьара чубохьу гIирс-коьчалла тала а теллина, цо болх муха бо а хьаьвсина дина зераш цахилар а ду. ХIинца еш йолу цIано еш йолу чоьнаш кхерамазалла ларьеш ца йо.
НеIарш масала лаххула мох кхетийта йитина херо а йолуш, неIар тIехь Iуьргаш хуьлура хьалха Советан Iедал долуш,хIинца иза а дац. Вентиляца олу-кх мох хьаьвзаш, дIаузуш хиларх. ХIаваъ чудогIийла декъаза, ледара хуьлу ХIинца иза а дац кхин хьесапе оьцуш а цхьаболчара.
Колонка чуьра хIуо-кислород дагадо,тIедогIу кхин дац,тIаккха луьйцуш вверг кхетамчуьра а волий охьавужу. Туьнталг дика йоцуш газ чухьийзош хила а тарло.. Соьга хаьттича нахана телехьожийлашкахь хьехамаш бан болийча, уьш кхето болийча во-м хир дацара. Иттаннах цхьа кхетча а дара-кх дика.
Кхерамазалла лар цаяр бахьнехь нислу-ш лаьтта баларш хьахаделча могIарерчу бахархоша шаьш билгалдоккхура, шений, шений и тайпа бохам хир бац аьлла, тоьхна чIагIонан мухIар долуш санна, бакълена а бала а кхаьчна, само ца еш берш кIезиг цахилар.