Хьалх-Мартанерчу кIоштан дарбан цIийнерчу лакхарчу лоьре гуш-хезаш шена бехк ца биллар дехийтина гIадужу-беттан 5-гIа де тIекхачалц тIеман билеташ схьа ца деанчу лоьрашна Украинерчу тIаме мобилизаци йийр ю, аьлла аудио арахецарна.
Дарбан хIусаман белхахо а, коьрта лор а республикан могушалла Iалашъяран министро Лорсанов Сулеймана шена тIекхайкхинера. Къурд алийтар гойту репортаж ЧГТРК "Грозный" телехьожийлан эфирехь арахийцира.
Дарбан цIийнан куьйгалхочо видео тIехь чIагIдо, мобилизацин хьокъехь хеттаршкахула кхеташо баккъала а хиллера, амма гIадужу-беттан 5-гIа де дIадаьлча лоьрех цхьа а фронте хьажор ву бохуш къамелаш дацара. Кехаташ кечдаран болх сихбан гIерташ баржийнера ша и хаам, амма "маьIна нийса ца дийцина" ша, кхетийна белхахочо.
Министрца къамел хиллачул тIаьхьа цо тIетоьхна, лаамхочун кепехь тIаме йаха кийча ю ша.
- Гезгмашин-беттан 22-хь Нохчийчоьнан куьйгалхочо Кадыров Рамзана "лерринчу тIеман операцин" оперативан штабаца хиллачу кхеташонехь республикехь мобилизаци хир яц, алла дIахьедира. Украинехь тIом боьдучу юкъанна республико "тIех сов кхочушйина" шен план, аьлла кхетийна цо. Цунах лаьцна репортаж меттигерчу телехьожийлехь арахийцира. Масех де даьлча Нохчийчоьнан куьйгалхочун пресс-секретаро Вахидов Iилмана дIахьедина, Нохчийчохь мобилизаци юхаяьккхина боху хаамаш баржийнарг "Оьрсийчоьнан а, йа махкара вайн зорбанан гIирсаш бацара", "оппозицигахьа бирзина гIирсаш а, телеграм-каналаш а яра" аьлла.
- Гуш-хезаш бехказбийлийта декхаре бар а, "бехкенаш" сийсазбар а шуьйра лелош ду Нохчийчохь. 2021-чу шеран гIадужу-баттахь Нохчийчоьнан вице-премьера Умаров Джамбулата дIахьедира, къурд алийтаран практика ерриг Оьрсийчухула яржо еза, аьлла. Аьнашбаран видеош яхийтар "исбаьхьа практика ю" аьлла хьаькамо, тIетоьхна, стагера баьлла бехк видео тIе дIабаззбина балахь "кхин а бух болуш ду иза" аьлла.
- Нохчийчуьрчу бахархоша "сийсазе гечдар доьхуш" гойтучу видеошна тидам бира Американ Цхьаьнатоьхначу Штатийн Комиссино шен дуьненаюкъарчу динан маршонех лаьцна 2021-чу шарахь арахецначу рапортехь. Талламан авторша хьийхира Вашингтонна, хьалхо ЧГТРК "Грозный" телехьожийлан директор хиллачу Нохчийчоьнан зорбан министрна Дудаев Ахьмадна дуьхьал санкцеш яха аьлла.