Гуттар чохь валла хан тоьхначу Нохчийчоьнан вахархочо Ражаев Мансура Пятигорскан кассационнан кхеле латкъам бинера - 200 эзар сом, Хабаровск-махкарчу №6 набахтехь ша латторан хьелаш хIоттийначу барамашца ца догIу аьлла. Кхело и компенсаци 3 эзар соьма тIе охьадаьккхира.
Кхелан сацамо дийцарехь, Ражаев герзаца гIаттамхойн тобанан декъахо лерича, цо Европерчу адаман бакъонийн кхеле латкъам бира. И беш кхело цуьнан бехктакхаман гIуллакхан йерриге материалаш йовзийта йезар. Амма цара и ца дира. Хьалхарчу декъах бен пайда ца оьцуьйтуш, витира. Ражаева иза шен бакъонашна эшам лерина.
Цуьнан компенсаци 200 эзар соьма тIера 3 эзар соьма тIе охьадаьккхинчу заводскойн кIоштан кхело а бакъдо иза ишта хилар. №6 йолчу набахтин куьйгалло цу сацамна латкъам бина, цкъа хьалха аппеляцехь, йуха кассацехь а. Цу гIуллакхехь кхело Ражаевн агIо лаьцна.
- ДIадаханчу шеран гIадужу-баттахь Нохчийчоьнан Лаккхарчу кхело Хабаровск-махкарчу № 6 набахтина Ражаев Мансурна кехаташ йаздаран бакъо дIайаккха ца магийра.
- Дагестанерчу Лаккхарчу кхело 2012-чу шарахь Ражаев Мансурна гуттар набахтехь йаккха хан туьйхира.Талламан а, кхелан а сацамаша дийцарехь, 1999-чу шарахь тIемлошца цхьаьна Ражаевс Дагестанерчу Тухчар йуьртахь йийсаре лаьцна волу Оьрсийчоьнан МВД-н йалх эскархо вийнера. Ражаевс ша цигахь вара, амма ша цхьа ца вийна аьлла, дIахьедира.
- Хьалхо Ражаевс ФСИН -нна латкъам бина, ши эзар сом схьадаьккхира. Хабаровск-мехкан "Снежинка" набахтехь суьдхошца а, адвокаташца а видео-зIе йечу шена нохчийн мотт бийцар ца магийра, аьлла.
- Нохчийчоьнан Лаккхарчу кхело резахуьлуш жоп делира гуттаренна чувоьллинчу Ражаев Мансурна. Оьрсийчоьнан Минфин-е шен гIуллакх бIегIийла долчу хеначохь чекхдаккхар доьхуш дина долу. Герзаца гIаттамхойн тобанан хилла декъахочо шен синна ницкъ барна 300 эзар сом догIу шена аьлла. Кхело и терахь иттуза лахдина.
- 2007 - чу шарахь Соьлжа-гIаларчу оперативан-талламийн декъехь айхьа лелийначу террор-зуламашна даре де бохуш, шена бинчу ницкъах а дийцира цо. ЕСПЧ-но цуьнан латкъам тIеэцна, 52 эзар евро цунна догIуш магийра.