Нохчийчохь, Краснодаран махкахь, кхечу регионашкахь а даккхийрачу, йа кегийрачу бехкашца бехктакхаман гIуллакх доладалале, стаг административан кепехь дIалоцу, наггахь масийттаза. "Новая газета. Европан" талламхошна хетарехь, оцу кепара ницкъахоша Iаткъам латтабо лаьцначарна тIехь, цаьрга шайна оьшу кийтарлонаш йалийта.
Масала, 2017-чу шеран мангал-баттахь Краснодаран аэропортехь паспортан контролехь терроризмана шеконашка а лаьцна, Нохчийчуьра ши вахархо дIалецира – Туркойчу ваха новкъаваьллера и шиъ. Оцу дийнахь хIоттийна ду Краснодарана 72 км генахь йолчу Горячий Ключ гIалин полисхоша протокол а – цу тIехь бахарехь, и нах хулиганалла лелорна лаьцна бу. Кхело административан кепехь чубоьхкира уьш, тIаккха уьш дIабахначул тIаьхьа йуха а дIалецира, тIаккха йуха а. 18 де дара цара чохь даьккхинарг, тIаккха уьш сихонца дIалецира терроризмана шеконашка лаьцна, тIаккха бехкаш дехкира царна оцу гIуллакхехула.
Оцу кепара масех гIуллакхаш долийна Горячий Ключ гIалахь.
Кхечу регионашкахь а леладо иза – масала, Ханты-Мансийн автономин гонехь. Цигахь терроралла лелоран а, герз, наркотикаш лелоран а артиклашкахула бехкебеш бу "Поддержка политзеков. Мемориал" проекто политикан тутмакхаш лаьрра болу бусалба нах. Царах цхьаъ Дагестанера вахархо ву. Оцу гIуллакхехь административан чуволлар леладо, талламан авторша бахарехь, СИЗО чохь латторан хан чекхйаьлла болу шеконашка лаьцна нах – керла бехктакхаман гIуллакхаш кечдаллалц буьту уьш лаьцна.
Уггар чIогIа леладо Нохчийчохь административан дIалацар хиллачул тIаьхьа бехктакхаман гIуллакх деллар – 2013-чу шарера 2021-чу шаре кхачалц йолчу хеначохь 170 оцу кепара гIуллакх карийна, царан 43% наркотикийн артиклашца ду.
- Дечкен беттан 20-хь Нохчийчоьнан чоьхьарчу гIуллакхийн министраллин белхахой Мусаева Заремин а, кхелахо лаьттиначу Янгулбаев Сайдин а Нижний Новгородерчу петар чу а лилхина, нуьцкъаха Мусаева Соьлжа-ГIала дIийигира. Цкъа дуьххара Мусаевина кхело 15 дей-буьйсий туьйхира чохь даккха, полисхо сийсазварна бехке а йина, цул тIехьа цунна дуьхьал бехктакхаман гIуллакх диллира -дийцарехь, протокол хIотточу йукъанна полисхочунна тIекхетта аьлла, Нохчийчоьнан куьйгалхочо Кадыров Рамзана бахарехь, "цуьнан бIаьрг боккхуш лаьттара цо". Бакъоларйархочун Янгулбаев Абубакаран а, оппозицихочун Янгулбаев ИбрахIиман а да-нана ду Янгулбаев Сайди а, Мусаева Зарема а.
- Астраханан пачхьалкхан артитектуран а, гIишлош йоттаран а университетан студент Вердиян Глеб лецира 2022-чу шеран гIадужу-беттан 28-хь – хулиганалла лелийна аьлла 10 денна чувоьллира иза. И админимтративан хан дIайаьлча Вердиян йуха а дIалецира, хетарехь, оцу набахти чуьра ара ма-валлара лаьцна иза, тIаккха оцу дийнахь Москван Лефортован кхело СИЗО чу хьажийра иза. Пачхьалкхана йамарт валарна кечам беш вара аьлла шеконашка лаьцна иза. Цуьнан адвокатна Павлов Иванна хетарехь, пачхьалкхана йамарт валарна тIехула гIуллакх доладалале Вердиян административан кепехь лаьцна латтош хиларо гайта мега, ФСБ-н белхахой шаьш кийча хилла цахилар, царна хан эшна хилла "бехктакхаман гIуллакх доладе аьлла барт бан".