Нохчийчоьнан вице-премьер, Кадыров Рамзанан йоккхаха йолу йоI кхаа кIиранах гергга регионан Iедалхойн кеп-кепарчу исс структурашна йукъа йахийтина, аьлла ду сайтера официалан документашкахь.
ГIуран-беттан 18-чохь бинчу сацамца 24 шо долу Кадырова Iайшат Iедал кхочушдаран органийн белхан эвсаралла гойтучу комисси йукъа йахийтина.
Бутт болалуш цо куьйгалла дира регионалан Дуьненайукъарчу кегийрхойн фестивалан комитетан, иза хир йолуш йу 2024-чу шеран чиллин-зазадокху беттанашкхаь "Сириус" федералан дозана тIехь.
ГIуран-баттахь иштта Кадырова заьIапхойн гIуллакхашкахула йолчу кхеташонна йукъайахийтина, лаамхой кхиочу кхеташонна а, пачхьалкхан кегийрхойн политика кхиорехула долчу хеттарийн координацин кхеташонна а, "Ден-ненан сийлаллин" мидалш йала хьалхатеттина нах толлучу комиссин декъах а дIатоьхна. Иштта Оьрсийчоьнан берашца а, кегийрхошца а цхьана болх барехула йолчу координацин кхеташонна йукъа а йахна, цо урхалла дийр ду "Демография", "Культура" проектийн комитетийн а.
Гезгамашин-баттахь Нохчийчохь къобалйира зударийн бакъонашна а, йукъараллехь цара дакъалацар а шайн тергонехь латтор долу кхеташо. Оцу йукъахь волчу бархI декъашхошлахь ша цхьаъ бен йоцу зуда йу Кадырова.
Хьалхо республикера культурин министр йара иза, ткъа гIадужу-баттахь Нохчийчоьнан вице-премьеран дарже хаийра иза.
Пачхьалкхан даржаш кхочу цуьнан Кадыров Рамзанан берашка, йижаршка, невцаршка, вешин, йишин берашка. Кавказ.Реалиино вовшахтуьйхира регионан пачхьалкхан структурашкахь белхаш бечу Кадыров 52 гергарчух тептар.
- ГIадужу-баттахь Кадырова Iайшатана "Нохчийчоьнна хьалха декхарш кхочушдарна" аьлла II-чу барамера орден йелира.
- Iайшат – Кадыров Рамзанан йоккхаха йолу йоI йу. Шен 17 шо долчу заманчохь Firdaws модин цIийнан директор хилира цунах. 2009-чу шарахь цуьнан нанас Кадырова Меднис схьдиллина дара и. 2020-чу шарахь цкъа йуьхьнаца регионан культурин министран хьалхарчу гIовсан дарже хIоттийра иза, ткъа 2021-чу шарахь 22 шо долуш министр хилира цунах. Цуьнан хIусамда Мацуев Висхан кху шеран товбеца-баттахь республикин вице-премьер а, йуьртбахаман министр а хIоттийра.
- Кадырова Iайшат "культурин хьакъйолу белхахо" йу, иштта мидалш йу цуьнан "Адамийн бакъонаш Iалашйарна" а, "Нохчийчоьнна хьалха декхарш кхочушдарна", регион "кхиорехь дакъа лацарна" а совгIат дира мехкан 100 шо кхочуш, ДоттагIаллин орден йелира "ДНР" аьлла дIакхайкхийначу мехкан цIарах, иштта Нохчийчоьнан лаккхара совгIат а – Кадыровн орден.
- Американ Цхьаьнатоьхначу Штатийн а, Евробертан а, Японин а санкцийн тептаршкахь йу 24 шо долу Кадырова Iайшат. Цул совнах Американ санкцешна йукъатоьхна Кадырова Iайшатан Firdaws модин цIа а.