Ницкъаллин блокана тIехь терго латточу Нохчийчоьнан вице-премьерна, "Терек" СОБР-н командирана Висмурадов Абузайдана тIеман инарла-майоран чин делла. Оьрсийчоьнан президенто Путин Владимира цуьнца догIучу омрана куьгйаздина. Висмурадовн кIантехь йу Нохчийчоьнан куьйгалхочун Кадыров Рамзанан йоI.
Висмурадовна керла цIе йаларх хаамбина Кадыровс шен телеграм-каналехь. Кремлан бакъонийн актийн официалан порталехь Путинан омра хIоттийна дац.
Висмурадов Абузайд – нохчийн "Терек" спецназан командир ву, Нохчийчоьнан куьйгалхочун уллорчу гонера а ву. 2019-чу шарахь Висмурадов Американ Цхьаьнатоьхначу Штатийн санкцийн тептаршка йазвинчул тIаьхьа ницкъаллин блокаца болх бен вице-премьеран дарже хIоттийра иза Кадыровс
Висмурадов Абузайдан кIантехь Рамзанехь йу Кадыров Рамзанан йоьалгIа йоI – Табарик. Иза, Кадыровн гонера цхьа могIа нах а санна, Украинан а, Американ а санкцийн тептаршкахь йу тIом бахьана долуш.
"Ахмат" клубан коьрта директор хIоттийра Висмурадов Рамзан 2022-чу шарахь, и клуб а йу Американ Цхьаьнатоьхначу Штатийн санкцеша лаьцна. Цул а хьалха клубан латархо вара иза, ийначу кепехь латаршкахь дакъа а лецира цо. Чиллан-баттахь "Нохчийчоьнна гIуллакхаш дарна" мидал йелира Висмурадов Рамзанна.
- Нохчийчоьнан куьйгалхочун бIанакъостех кхин а масийттана- Укрианерчу тIамехь дакъалаьцначу- керла совгIаташ дийкъира, даржашкахь лакха а бехира уьш. Царех цхьаберш бехке бу нах байъарна а, царна тIехь ницкъ латторна а.
- Кадыровна луьйш болчу ЯнгулбаевгIеран вежаршна уьш хIаллакбийр бу бохуш кхерамаш туьйсучарех дIакхийтира Висмурадов Абузайд 2022-чу шарахь. Ша Кадыровс а, Оьрсийчоьнан парламентан депутато Делимханов Адама а, нохчийн лаккхарчу ницкъаллин структурашкара даржхоша а тийсинера царна и кхерамаш.
- Пачхьалкхан кеп-кепарчу тIегIанера даржашкахь Нохчийчохь ву КадыровгIеран 100 ца кхоччуш гергара стаг – бераш, йижарий, невцарий, йишин-вешин бераш, шичой, маьхчой. Кавказ.Реалиин редакцино вовшахтуьйхира КадыровгIеран цIийнах мел волчу, республикин пачхьалкхан структурашкахь белхаш бечех дуьззина тептар.
- Кадыровн гергарнаш даржашкахь лакхабаьхна, царна совгIаташ декъна ца Iаш, хIонс йужу цуьнан бIанакъостийн берашна а цхьана. Ша кхоьллинчу политикан элите орамаш хецийта и кеп йу Нохчийчоьнан урхалхочо къастийнарг, билгалдаьккхира Кавказ.Реалиин редакцино хеттарш динчу эксперташа.