Нохчийчуьрчу Веданан кIоштара Дышни-Ведана юьртахь дIавоьллина меттигера ши вахархо, Украинана дуьхьал бечу тIамехь вийна волу. Дебишев Казбек а, Мурадов Аслудди а ву и шиъ.
Шайн хьасташкахула Кавказ.Реалиина къаьстина, и шиъ Стигалкъекъа-беттан 29-чохь кхалхарх. Дебишевн 38 шо дара, цуьнан хIусамнана а, ши кIант а висина. Мурадовн 37 шо дара, цуьнан диъ бер ду.
Тезетахь хилира Дышни-Ведана юьртан администрацин куьйгалхо Абдурзаков Алихан а, амма кIоштан официалан аккаунташкахь 13:00 сахьт даьллачу хенахь беллачех бина хаам бац.
Baza телеграм-канало дийцина, Мангал-беттан 1-чохь Украинехь веллачу Кадыровн цIарахчу лерринчу полкан 4-чу батальонан куьйгалхочух Димаев Заурах. Уьш тIехь боьлху "УАЗ Патриот" машен артиллерин тохаршна кIел нисъеллера Камышеваха олучу меттигехь. Димаев воцург а, вийна кхин а нохчийн полицин кхо белхахо, чевнаш йина веанна. Церан цIераш Кавказ.Реалиина цкъачунна къаьстина яц.
Карарчу хенехь Кавказ.Реалиина хууш ю, Украинехь веллачу Къилбан а, Къилбаседа Кавказан а бахархойх 577 эскархочух лаьцна; Дагестанера 159 ву веллий хуучех, Къилбаседа-ХIирийчуьра – 73, Волгоградан кIоштара – 99 стаг. Нохчийчуьра мел лахара а, 28 стаг валарх тIечIагIдина Кавказ.Реалиино, амма официалехь исс стаг кхалхарх бен хаам бина бац. Регионера 120 сов ву велларг аьлла, яздира бакъоларъярхоша.
И хаамаш зорбанан гIирсашкара а, Iедалхойн дIахьедаршкара а, Кавказ.Реалиин хьостанашкара а бу. Биллгал болу эшамаш хаъал дукха хила тарло.
- "Оьрсийн Би-би-си-н" лараршца, оцу регионашкара велларг 176, 70, 109 стаг ву. Верриг а Украинехь велларг 3 052 ву, гIирсана хууш, царех 152 – лакхара эпсарш бу. Журналистийн зерашца, меттигерчу администрацеша а, зорбанан гIирсаша а кешнашкахь дIабохкарх лаьцна бен хаамаш буьстича, беллачех тIечIагIдинчу тептаршкахь 40-60 процентна кIезиг хила тарло кхелхинчийн цIераш, билггал Оьрсийчохь дIабоьхкинчел а.
- Оьрсийчоьнан тIеман министралло шозза зорбане яьккхира хиллачу эшамех информаци: Зазадокху-беттан 2-чохь хаамбира 498 стаг кхалхарх, Зазадокху-беттан 25-чохь – 1 351 стаг. Украинхойн агIоно чIагIдо, Оьрсийчоьнан эскархошлахь эшамаш дикка лакхара бу бохуш.
- Охан-беттан 20-чохь дийца даьккхира, Украинехь беллачех хаамаш къайлабахьа сацамбарх Оьрсийчоьнан тIеман министралло.