Нохчийн республика Ичкерина Оьрсийчоьно оккупаци йина хилар а, нохчийн къоманна тIехь геноцид латтор а билгалдоккхуш Украинан Лакхарчу радо бина сацам къобалбеш митингаш, пикеташ хилла Европерчу масех гIаланашкахь. Страсбургехь, Берлинехь, Варшавехь, Венехь, Стамбулехь хилла акцеш.
Барамийн декъашхоша – оцу мехкашкара нохчийн диаспорийн векалша – Лакхарчу радин депутаташна баркал олуш резолюци тIелецира.
Кавказ.Реалиига хаамбина ма-хиллара, Нохчийн республика Ичкерин арахьарчу Iедало гIо а латтош хIиттийнера акцеш, хIора гIалахь масех иттанаш нах гулбелира. Берриг барамашкахь Нохчийн республика Ичкерин байракхаш лелийра, иштта Ичкерин президентийн Дудаев Джовхаран а, Масхадов Асланан а суьрташ а.
"Сатуьйсу, Лакхарчу радо бинчу и сацамо кхечу пачхьалкхьийн парламентхошна масала лург хиларе, Нохчийн республика Ичкерина гIодан а, цуьнан йозуш цахилар къобалдан а", - дуьйцу Страсбургерчу бараман декъашхоша бинчу кхайкхамехь.
- ГIадужу-беттан 18-чохь Нохчийчоьнан Ичкерия республика Оьрсийчоьно ханна оккупаци йина территори лоруш, нохчийн къомана йина геноцид емалъеш, сацам тIеийцира Украинан Лакхарчу Радехь. Оцу сацамехьа кхаьжнаш тесира цигахь хиллачу 287 депутато. Кхин а 64 депутат кхажтаса ца хIоьттира. Долчух кхеточу кехата тIехь дIахьедо, 1991-чу шарахь СССР-н декъера Нохчийчоь ара а яьлла, Ичкерия аьлла, ша йозуш цахилар цо дIакхайкхийра. Текстехь чIагIдо, ООН-н уставехь билгалъяьхна цхьа бакъо хиларан а, къаьмнийн шаьш шайн кхоллам нисбан а принципаш йоллушехь, Оьрсийчоьно цунна дуьхьало йира.
- Украинан агIор тIемаш беш ю Дудаев Джохаран цIарах батальон (командир ву Осмаев Адам), ВСУ-н структурин декъах йолу "Акха арданг", иштта, ЧIебарлойн Муслима куьйгалла ден Шейх Мансуран цIарах батальон а – лаамхойн тобанан бакъонашца. Нохчийчоьнан куьйгалхочо миллион доллар кхаъ кхайкхийра украинхойн Дудаев ЖовхIаран а, Шейх Мансуран а цIарахчу батальонийн буьйранчаш – Осмаев Адам а, ЧIебирлойн Муслим а - болу меттиг йийцинчунна.