Шелковскан кIоштара Червленная эвлара 44 шо долу Гакаев Роман бехке лаьрра 1999-чу шарахь орсийн эскархошна тIелетта хилла аьлла. Шогачу хьелашкара набахтехь даккха 20 шо кхайкхийна цунна.
Официалан версица, Басаев Шемалан а, Хаттабан а тобанхойн декъехь хилла ву Гакаев, хаамбира Къилбан гонашкара тIеман кхелан пресс-гIуллакххоша. Кхело хьесап дарца, 1999-чу шеран гIадужу-беттан 4-чохь дакъалаьцна цо салташна динчу тIелатарехь (автомат йиттина царна). И тIелатар бахьана долуш вийна 15 эскархо, кхин а 28 чевнаш йинера.
Гакаев бехкевира герзашца гIаттийначу бунтана а, бандитизмана а, ницкъахойн дахарна тIекховдарна а. Хьо бехке лорий ахь аьлла, суьдхочо шега дина хаттар жоп доцуш дитира Гакаевс, хаамбо "Кавказский узел" гIирсо.
- Басаевн а, Хаттабан а тобанаша тIемаш бира Дагестанехь 1999-чу шеран марсхьокху-баттера гезгамашин-бутт йуккъе баллалц. ТIемалойн хилла, талламан версица, цхьа эзар ахэзар гергга. Оцу хиламех цхьахдолу бахьана хилира контртерроран операци йолоран.
- Бехктакхаман жоьпалла тIедожадо иштта, 1990-2000-чу шерашкахь федералан эскаршна дуьхьал тIом бина, цул тIаьхьа амнисти еллачарна а.
- Адвокаташа а, бакъоларъярхоша а дечу тоьшаллашца, тIемалой хиларна бехкебеш жоьпе ийзиначу наха дукха хьолехь кхелашкахь хаам бо, шайга ницкъаша дареш дайтина, олий.