Нохчийчуьра чохьарчу гIуллакхийн министр Алханов Руслан Оьрсийчоьнан экстремизмана дуьхьало латточу коьртачу урхаллин куьйгалхочун гIовс хIоттийна. Оцу урхаллех Центр "Э" олу.
Алханов даржехь лакхаваккхарх хаамбина Нохчийчу веанчу Къилбаседа Кавказан федералан гонашкахула чоьхьарчу гIуллакхийн министр волчу Бачурин Сергейс. Цо дIахьедина, республикера МВД-н урхаллин коьртехь 19 шарахь лаьттинчу Алхановс "регионехь низамаш а, бакъонаш а чIагIйеш" къепе латтийна. Нохчийчохь Алхановн дарж хьанна кхочур ду, керла декхарш кхочушдан а маца дIаволалур ву, цкъачунна хууш дац.
Инарла-полковник Алханов Нохчийчоьнан куьйгалочун цхьахйолчу йоьIан марда а, цуьнан йуьртахо а ву. Иза вина 1962-чу шарахь Нохч-ГIалгIайчоьнан АССР-н ЦIоьнтарахь. Республикера МВД-н даржехь иза ву 2004-чу шарера схьа дуьйна. Цул хьалха, 1999-чу шеран гIуран-баттахь, Алхановс куьйгалла дира муфтийн Кадыров Ахьмадан (Кадыров Рамзанан ден) хадархойн сервисан, цул тIаьхьа дукха ца Iаш Нохчийчоьнан республикин администрацин куьйгалхо хилира иза. "Дайшкара схьа ницкъахо" лоруш ву Алханов – цуьнан деда Советан заманхь НКВД-хь гIуллакх деш хилла ву, цунах лаьцна Кадыровс ша дира дIахьедар.
Алхановс махкарчу чоьхьарчу гIуллакхийн министраллехь урхалла дечу йукъанна Нохчийчуьра МВД-н урхаллин белхахоша жигарадаьккхира нах лечкъор, царна тIехь ницкъбар, Кадыров Рамзанан рожана резабоцурш лецар. Оцу йукъанна хьаькамо массарна а гергахь оцу кепара барамаш бакъбо.
2022-чу шеран гIуран-баттахь санкцеш кхайкхийра Канадо Алхановна дуьхьал, адамийн бакъонаш талхорна гунахь хиларна а, Украинана дуьхьал тIом бакъбарна а.
Алхановн 28 шо долу кIант Адам Кадыров Рамзанан шолгIачу йоьIан Хадижатан хIусамда ву. Стохка Нохчийчоьнан вице-премьер вира цунах.
Цул совнах, 39 шо долу, МВД-н министр лаьттинчун воккхаха волу кIант, Алханов Артур 2019-чу шаре кхаччалц Устрада-ГIалара чоьхьарчу гIуллакхийн хьаькам вара полковникан чинехь а волуш, цул тIаьхьа Соьлжа-ГIалара Ахматан кIоштара белхазаллин центран директор хIоттийра иза. Алханов Русланан кхин цхьа кIант, 36 шо долу Бислан Грозненскан кIоштан чоьхьарчу гIуллакхийн министраллин декъан хьаькам ву.
- ТIечIагIбазчу хаамашца, Алханов Русланан йиъ йоI а йу, Лира а, Рената а йу шиннан цIе. 2017-чу шарахь "Дождь" телеканалан журналисташна гучуделира, Москвахь АлхановгIеран уггар а тоьллачу меттигехь 75 миллион сом мах болуш ши петар хилар. Экс-министран хIусамненан Тамара Борисовнин цIартIехь ду ишта Соьлжа-ГIалара Кадыров Рамзанан резиденцина дуьххьал йолу 1000 квадратан метарш йолу лаьттан дакъа а
- "Важные истории" гIирсан хаамашца, Алхановн кIентан Адаман, территориалан ОМС фондан куьйгалочун гIовс волчу, 2020-чу шаре кхаччалц муххале а долахь йара Палма Джумейра гIайри тIера аппартаменташ. Чу ара ца баккхалучу цуьнан бахаман мах бара 700 эзар долларш сов.
- Кавказ.Реалиино вовшахтуьйхира регионан пачхьалкхан структурашкахь белхаш бечу Кадыров Рамзанан 52 гергарчух тептар. Царлахь – Нохчийчоьнан куьйгалхочун йоьIарий Iайшат (республикан культурин министр), Хадижат (Соьлжа-ГIаларчу школазхойн департаментан хьаькам), ХутIмат (Кадыровн секретариатан куьйгалхочун гIовс), иштта цуьнан воккхаха волу кIант 17 шо долу Ахьмад, Оьрсийчоьнан берийн, кегийрхойн боламан куьйгалхо ву иза.