Your browser doesn’t support HTML5
Ахматова Раиса. ХIун хилла суна...
Хууш яц, хIун хилла сайна:
Ницкъ кхачац йовза хьан къайле,
Я сан дог кIадделла-техьа,
Я хьан дог шелделла-техьа?
БIаьргаш чохь гергарло кхайкхош,
Лийцира вай вовшийн куьйгаш.
Дегаза хилла-те довзар?
Я хилла хьо харц дерг дуьйцуш?
Сайн хIусам шелъелла хета,
Декхна де хетало буьйса,
Хьо ца гуш, сагатло - кхета:
Безамо даг чохь кIеж туьйсу.
Дог паргIат лелачу хьуна
Хаац со, сагатдеш, хьегар.
Хууш яц, хIун хилла сайна,
Лалац-кха хьо сайца эгIар...