Сирлачу шовданан коьртехь,
Хих кIудал юьзна а яьлла,
ДIаяха кечъелла хьо ас
Сацийра: - Хи лохьа, - аьлла.
Хьоь хьаьжча, дог чIогIа хьагло,
БIарзвелла, къурд байта соьга.
Дагахьдерг соь ала ца ло,
Ца керчаш, мотт багахь соьцу.
Кховдабе хин чаме соьга,
Хьостано дIо седа санна,
Дог хьастий, схьахьажа соьга,
Кхин рицкъа хьашт дац-кха вайна.
Лам айбар белшо а лайна.
ХIуттур ву со хьуна хьалха.
Ахь соьга, ела а елла,
Дош алахь ирс деъна вайга.
Елало, дог цIена хьовза,
ДIаэца сан са а хьайна.
Реза ву тIулг хилла саца,
Ахь декъахь сан дахар хьайца.
Ахь чами кховдийна къурд бахь,
Iебар ду шовданан хих са;
Сакъераделла, ахь дош лахь,
Хала дац халонца къийса...
