Шинарийдийнахь Нохчийчоьнан Республикан Де олучу бараман митинге шаьш ницкъаша ийзийнера, бохуш леткъамаш бо Соьлж-ГIаларчу студенташа.
Деша баьхкина кегийрхой гIали юккъе митинге дIабигира, яздо «Кавказан Узел» газето. 25 шо хьалха Гезгмашин-беттан 6-гIа де Нохчийчоьнан маршонан Де аьлла къастийра Оьрсийчоьнах дIакъаьстинчу мехкан парламенто. Амма оцу дийнах и цIе хадош, Республикан Де аьлла хийцира 2002-чу шарахь мохк Оьрсийчоьне юхаберзош Кремлна гIодинчу Нохчийчоьнан администраторо Кадыров Ахьмада.
Европерчу массех махкахь бехачу нохчаша барамаш дIабаьхьна шаьш дехачохь Нохчийн Республика Ичкери кхоллаелла лору Маршонан Де даздеш.
