Шемахь вийна Оьрсийчуьрчу «Вагнеран» тIеман компанин декъашхо, хьалхо Украинерчу конфликтехь дакъалаьцна волу Мордовера вахархо Эбель Юрий. Цунах лаьцна хаам бина Саранскерчу Stolitsa-S зорбанан гIирсо, вийначуьнан гергарчарна тIе а тевжаш.
Цара дийцарехь, ГIадужу-беттан 20-чу дийнахь Эбель юкъахволчу 18 герзхочух лаьттачу тобанна тIелатар дина тIемалоша. Дийна цхьа а ца висина.
Эбелан иза 5-гIа командировка хилла Шема. Иза вийна хиларх лаьцна хаам бина цуьнан доьзале Лахьан-беттан 1-чу дийнахь. ТIаьхьо гергарчаьрга дIаделла цуьнан дакъа.
Интернетехь и хаам карийначу Conflict Intelligence Team цIе йолчу талламан тобано бинчу хаамца, Эбель гIуллакх деш хилла хьалха Оьрсийчоьнан Коьртачу Талламан Урхаллан (ГРУ) эскаран цхьана декъехь.
