ГIадужу-беттан 9-чу дийнахь Нохчийчоьнан куьйгалхочо цхьа а тоьшалла а доцуш, ша вен кечам беш хилла аьлла дIакхайкхор, шеггара долийна хIума ду, аьлла дIахьедина "Новая газета Европа" гIирсе махкара къайлахчу сервисашкара лаккхарчу даржера церан хьосто. Цо бахарехь, "баккъалла а стаг вен гӀоьртинчу хьелашкахь" Кадыровн а, цуьнан гонан а лелар даима цIеххьана хийцало, амма тӀаьххьарчу беттанашкахь Нохчийчоьнан куьйгалхочун графикехь цхьа а хийцамаш бац, йа цуьнан кхерамазалла а чӀагӀъйина йац.
Ша вен дагахь хилла аьлла, регионан куьйгалхочун дIахьедар хьосто доьзна, шен дуьхьалончаш шех дагабовлийта Iалашонца. Вен гӀортар вовшахтоха гӀерташ хилла аьлла, Кадыровс массарна а хьалха бехкевира Федерацин Кхеташонан декъашхо, Дагестанера миллиардер Керимов Сулейман а, Пачхьалкхан Думан ши депутат – иза а Дагестанера схьаваьлла Курбанов Ризван а, ГӀалгӀайчуьра Барахоев Бекхан а ву. Wildberries йухайекъа хьийзарехь коьрта бенефициар ву аьлла, хаамийн гIирсаша цIераш йаьхна Керимовн а, Барахоевн а.
"Тхоьгахь цхьана а кепара оперативан хаам бац, ишта йац йа билгалонаш а [Кадыровна кIело йеш хиларх]", - билгалдаьккхина "Новая газета Европа" гIирсаца къамел динчу Оьрсийчоьнан къайлахчу сервисашкара белхахочо.
Хьалхо депутато Курбановс зорбане йаьккхира видео, цу тӀехь цо дӀахьедира, ша "цкъа а дакъалаьцна вац лараме Кадыров Рамзан Ахматович вен кечамбечаьрца" аьлла. Барахоевс а дира изза: Малгобекехь деш долчу маьждигехь хиллачу цхьаьнакхетарехь цо шен ненан маттахь комментарий йира хӀоьттинчу хьолана, шена "хӀумма а ца хаьара" Нохчийчоьнан куьйгалхо вен гӀортар кечдеш хиларх лаьцна аьлла.
Шена тийсинчу кхерамашна Керимовс жоп ца делла. Амма цуьнгахьа вистхилира Дагестанан куьйгалхо Меликов Сергей. ГIадужу-беттан 12-чохь ХIинжа-ГIалахь парк схьайоьллучу барамехь цо дIахьедира, миллиардеро махкана даим а гIо деш хиларх, "Дагестано цунна гIортор йийр йу хало тIехIоьттинчу минотехь" аьлла. ТIаьхьа дийца даьккхира, сенаторна "номер 1 йолу Дагестанан сийлахь вахархо" цIе йаларх.
- Нохчийчоьнан куьйгалхочо тоьшаллаш ца далийра, ша вен дагахь хиларх; стаг вен гӀортарна кечам беш хилла бохучух лаьцна таллам дӀаболорах лаьцна а хаам бина бац. Иштта информаци йац Кадыровн хьокъехь таллам барх а, цуьнан дIахьедар Зуламан кодексан стаг вен кхерамаш тийсар аьллачу артиклна юкъадогӀуш делахь а. Оцу бехкана лаьцначунна пхеа шаре кхаччалц набахтехь йаккха хан туху, кхело билгалъдаьхначу даржашкахь болх бан бакъо дӀайаккха а тарлуш.
- Нохчийчоьнан куьйгалхочо тийсинчу кхерамех лаьцна бистхилира Кремлехь берш гIадужу-беттан 16-чохь. Песков Дмитрийс хьийхира оцу девна йукъахь болчарна полици дIахъедар: "Оцу хьолах лаьцна оха комментарий йеш йац. Нагахь санна, туьйсуш кхерамаш белахь а, бакъоларйаран органашка дIахьедан деза, цара низаме хьаьжжина оьшу барамаш тIеоьцур бу".
