Оьрсийчуьра вовшахтоьхначу футболан клубан хилла тренер Черчесов Станислав духьал хилла нохчийн "Ахмат" клубан куьйгалла дан. И хаамбина, клубана гергарчу хьастана тIетевжина "Чемпионат" гIирсо. Черчесовс а, командо а оцу информацих лаьцна комментарий йина йац
Оьрсийчоьнан премьер-лигин керлачу сезонехь Соьлжа-ГIалара клуб хьалхарчу йеа турехь доьазза ийшира. Оьрсийчоьнан Кубкехь Нохчийчуьра тоба шина а матчехь шозза йийшира. Цул тIаьхьа коьрта тренер Аушев Сергей дIаваьккхира.
"Ахмат" клубан президент ву Даудов Мохьмад, Нохчийчоьнан парламентан куьйгалхо, мехкан урхалхочун Кадыров Рамзанан уллора доттагI. Ша Кадыров "Ахматехь" лараме президент ву.
Черчесов Станислав "Ахматан" тренер лаьттина ву 2011-чу шарера 2013-чу шаре кхаччац, хIетахь "Терек" олура цунах. Гуллит Руд дIаваьллачул тIаьхьа кхайкхинера иза командин куьйгалла дан, Кадыровс ша дIакхайкхийра иза дIаваккхарх, Оьрсийчоьнан чемпионатехь Пермера "Амкарца" ловзуш эшначул тIаьхьа
2023-чу шеран товбеца-баттахь Черчесов дIавелира Венгрин "Ференцварош" клубера, цул тIаьхьа чемпионийн Лигин квалификаци йукъара а велира.
- Американ Цхьаьнатоьхначу Штатийн Iедалхоша "Магнитскийн глобалан актан" буха тIехь санкцийн тептаре йазйира футболан а, латархойн а "Ахмат" клубаш. Адамийн бакъонаш хьешна аьлла хетачу нахана дуьхьалдоккху Вашингтоно и тептар.
- Говрийн-спортан а, футболан а, латархойн а Кадыров Ахьмадан цIарахчу Нохчийчуьра клубашна стохка дайинчу ахчанийн барам бара 7 миллиард 725 миллион сом. ХIора шарахь республикин бюджетера миллионаш хьийсадо меттигерчу "Ахмат" клубан стадионехь вип-хьеший кхобург. Бозуш боцчу зорбанийн гIирсаша масийттазза йаздира, "Ахматан" матчашка бюджетан белхахой, балхара дIадохур ду бохуш, кхерамаш а туьйсуш, бертаза хьийсабо бохуш.
