ГIалгIайчуьра вахархо дуьненан а, федералан а лехамашка велла – цунах шеконаш йу, цо террорхойн гIуллакх лелийна аьлла.
2017-чу шеран дечкен-бутт бале Шема дIавахана, Оьрсийчохь йихкинчу цигарчу дуьненайукъарчу организацих дIакхетта хилла иза. Цо дакъалаьцна тIемашкахь оцу пачхьалкхан куьйгаллина дуьхьал аьлла ду Талламан комитетан меттигерчу урхаллин пресс-гIуллакххойн хаамехь.
Гандаров Белан ву бехкехетарг, билгалдоккху ницкъахошца йоьзначу "Розыск Ингушетия" телеграм-канало. Цуьнан хьокъехь тоххара а дуьхьал даьккхина хилла бехкзуламан гIуллакх, террорхойн гIуллакхна йукъаийзош кхайкхамаш барна.
Ютьюбехь хIиттийна йу Гандаровн видеороликаш, цу тIехь ша "муджахIид" ву боху цо, вистхуьлу иза "дозанал арахьа, йа даймахкара массо а вежаршка, шайн "халкъ Iалашдан арадовла жоьпаллин муьрехь". Иштта цо хьахабо шен роликашкахь, стохка зазадокху-баттахь бакъоларйаран органийн белхахошна цхьа могIа тIелетарш дарна бехкебен ГIалгIайчоьнан бахархой а, царех шен "вежарий" а олуш.
- 2023-чу шеран охан-баттахь ГIалгIайчохь герзаш диттина вийра, ницкъахошна тIелетарш дина аьллачу шеконашца виъ стаг, кхин а ши стаг лецира – исс лаца кхайкхийра. Iедалхоша чIагIдора, тIелеттачара шаьш Оьрсийчохь йихкинчу террорхойн ДаIиш организацин агIончаш ду бохуш.
- Йуьхьанца лаца кхайкхийнера йалх стаг. Зазадокху-беттан 29-чохь царех цхьаъ, Эльдиев Рамазан, Карабулакехь велла карийра, тIелеттачу заманчохь йинчу чевнех кхелхина хила тарлора иза. Коттоев Мовсаран дакъа схьакарийра Малгобекан-кIоштара Iелин-Йуьртахь оханан-беттан 5-чохь, дийцарехь, цуьнан четахь граната иккхинера. Оханан-беттан 7-чохь лецира лехамашка велла хилла Боков Iамир, шолгIачу дийнахь пачхьалкхан зорбанан гIирсаша йаздора, воьалгIа тIелеттарг а лаьцна ницкъахоша, иза ву 24 шо долу Мошхоев Микаил бохуш. Иштта ГIалгIайчохь цхьа могIа герзаш деттарна айдинчу гIуллакхехула кхин а шиъ лехамашкахь вуьсура: 33 шо долу Нуражев Амирхан а, 35 шо долу Оздоев Адам.
- Зазадоккху –беттан 27-чу буса бевзаш боцчу наха герзаш диттира ГIалгIайчоьнан а, Къилбаседа ХIирийчоьнан а дозанера полицин постана, цул тIаьхьа къайлабевллера уьш. Шина поличхочунна чевнаш йира. Охан-беттан 3-чохь муьлш бу цахуучу наха герзаш диттира Iелин-Йуьртара полицин белхахошна тIе, цхьа ницкъахо лазийра. Цул тIаьхьа охан-беттан 5-чу буса Малгобекан кIоштара Зязиков-Йуьртахь йуха а герзаш диттира – вийра кхо полисхо, бархIанна чевнаш йира.
- Масех бехктакхаман гIуллакх диллира Оьрсийчоьнан Талламан комитетео ГIалгIайчохь а, Къилбаседа ХIирийчохь а цхьа могIа тIелатарш хиллачул тIаьхьа. Шина артиклехь толлур ду уьш: бакъоларйаран органан белхахочун дахарна тIекховдар, бакъо йоцуш герз лелор а.
