ГIезгамашин-беттан 10-чу буса Москван кIоштара Раменскера дукхазза тӀекӀелдина цIенна тIеэгна дронаш – цIейаьлла, цу чуьра йахархо йелла. ТIелатарна Iедалхоша бехкейина Украина.
Йеллачу зудчун 46 шо хилла, кхин а виъ стаг лазийна – мел лахара а кхоъ дарбан цIийне охьавиллина, хаамбина Подмосковьен губернаторо Воробьев Андрейс. ЦIе дIайайъина.
Дронаш йогIуш, цара тохар дар а, цIе кхарстар а зорбанашкахь даржийна и суьрташ гинчара.
Хаамашкахь дуьйцу дронан тохарша мел кIезиг а ткъа петар йохорах: йалх балкон йерриг а йаьгна, кхин а йалханнан куьзганаш аьтта, кIурзан лараш йиссина.
Кхин а цхьа дрон кхетта иштта тIекIелдинчу Раменскера цIийнах – йохийна петар, лазийнарг ву цигахь а. Цуьнгарчу хьолах лаьцна хууш дац.
ХIусамашкара арабаьхна бахархой дIатарбина ханна царна йеллачу каппашкахь. Карарчу хенахь цигахь ву 43 стаг.
Меттигерчу бахархоша а, телеграм-каналаша а хаамбо Раменскера кхозлагIа а масийтта гIатах лаьттачу цIийнах цIейаларх, дронаша тIелетарш динчул тIаьхьа.
Цул совнах кхин а цхьа дрон охьайоьжна Прудки эвлара хьуьнхахь.
Буьйсанна тIелеттера Подмосковьера Жуковский аэропортана – цигара кеманийн асанаш дIакъевлинера йу. Кхерамзалла ларъйеш рейсаш совцийнера иштта Внуково, Домодедово аэропорташкахь а. Кхаа аэропортийн болх дIаболийна карарчу хенахь.
Раменский йоцург а, Воробьевн информацица, дронаш йохийна Подольскехь, Люберцехь, Домодедовехь, Коломнехь. Каширера дронех лаьцна а бинера хаам.
Дронан геригаш Каширскан шоссехь охьаэгнера – Москван агIор и дIакъевлинера, хаамбина Домодедово гонийн куьйгалхочо Хрусталев Евгенийс.
"Москва листинчу" дронех " буса сахиллалц информаци карлайаьхначу телеграм-каналехь чIагIдо, зуда а леш, Раменскера тIекIелдинчу цIийнах а, Жуковскийн аэропортехь а цIейалар нисделла "тIелатар йухатухуш" а, "дронийн геригаш охьаэгаш" а. Воробьевс пайдаэцна нейтрале дешнех.
Оьрсийчоьнан тIеман министраллан информацица, цу буса Оьрсийчоьнан регионаш тIехула хьийзаш хилла йерриг а хIаллакйинарг 144 дрон йу. Москван кIоштана тIехула хилла ткъа дрон а цхьаьна. Кхин а 72 дрон йохийна Брянскан кIоштахь, йиссинарш – Белгородан, Курскан, Воронежан, Липецкан, Орловн, Калугин, Тулан кIошташна тIехула хилларщ.
ТIаьххьарчу кIоштахь дронийн геригаш тIеэгнера йагорган-энергетикан комплексан гIишлона, лазийна-вийна стаг вац цигахь, хаамбина хьаькамаша.
- Оьрсийчоьно Украинана буьззинчу барамехь тӀелатар долийчахьана, Оьрсийчоьнан регионашна хаддаза тохарш до, дронашца тӀелатарш а цхьана до цигахь. Оьрсийчоьнан тӀеман министралло дIахьедо Украинан тӀелатарш "йухатохарх", хаам бо Оьрсийчоьнан дозанаш тӀехула хьийза ракеташ а, дронаш а хIаллакдарх лаьцна. Йохийна гIишлош йу, лазийна нах бу. Дукха хьолахь, Киево комментари ца йо оцу хаамашна.
