Америкахойн журналист, хIордан пехотин хилла талламхо Риттер Скотт цхьана шарчохь шолгIа Нохчийчохь тIеэцна. Экскурси йина цунна йуха а Гуьмсехь "Оьрсийчоьнан спецназан университетехь". Кадыров Рамзана дегайовхо къадийна, цунна гинчо республико Украинерчу тIамна дуьхьал лоцучу декъан мах хадабойтур бу аьлла.
Американ Цхьаьнатоьхначу Штатийн хилла талламхо шен доьзалца цхьаьна Соьлжа-ГIалин аэропортехь тIелецира Нохчийчоьнан зорбанан министро Дудаев Ахьмада. Цигара дIа Гуьмсера кхийсархойн полигоне бахара уьш, камерана хьалха Iалашонашна тIе герз диттира цо. "Оьрсийчоьнан спецназан университет" йоцург а, Шелара маьждигехь а хилира иза, дийцина Дудаевс.
Официалан хIун Iалашо йу цуьнан Нохчийчу варан, дуьйцуш дац, амма Кадыровс дIахьедира иза "ларамца тIеэцаро" хьешан нийсонца ойла кхуллур йу республикех а, Украинерчу лерринчу операцихь (ишта олу Украинерчу тIамах официалехь Оьрсийчохь.-Редакцин билгалдаккхар) цо лоцучу деъан а. Бахначу стигалкъекъа-баттахь веара Риттер Нохчийчу, шен "Гонка разоружения" книгин презентацин гурашкахь – делахь а, цунах лаьцна а кхин совдаьккхина хIетахь ца дийцира цо.
ХIордан пехотин хилла талламхо къаьсттина гоьваьлла ву Оьрсийчоьнан зорбанашкахь Украинана дуьхьал тIом болийчхьана, Путин Владимиран политикехьа ву ша бохуш, дIахьедарш дора цо. Карарчу заманчохь Америкехь дIакъевлинчу Russia Today каналан сайтехь авторан политикан колонка дIахьош вара иза. Уьш йерриш а аьлча санна, Штатийн арахьарчу политикана критика йеш кечйина хуьлура даим а.
- 2000-чу шерийн йуьххьехь, Цхьаьнатоьхначу Къаьмнийн Организацин хьаькам ша волчу хенахь дуьйна, Риттер Скотт уггар а гоьбевллачу, Америко Иракъехь болийначу тIамна дуьхьал болчех вара. 1998-чу шарахь Риттер балхара дIавелира, цо бехкебира америкахойн талламхой, БагIдадера векалтан спецкомиссех шпионажан база йарна; Риттера бахарехь, ООН-н инспекторшна гIо дечу меттана, ЦРУ Саддамана тIаьхьайаьллера, иза вохон планаш хIиттош. Оццу шеран гIуран-баттахь комиссин белхахой дIабахара БагIдадера.
- Американ Цхьанатоьхначу Штатийн финансийн министраллин арахьарчу активашна тIехь Iуналла латточу урхалло "Iаьржачу тептаре" ваьккхира Кадыров Рамзан а, цхьа могIа цуьнан доьзалера нах а. США-н бахархошна а, резиденташна а дихкира цаьрца бизнес лелор.
- 2017-чу шеран гIуран-баттахь США-н финансийн министралло Нохчийчоьнан куьйгалхо санкцийн "Магнитскийн тептаре" йазвира. Урхалло жоьпалла диллира цунна тIе кхел йоцуш нах байарна а, ницкъбарна а, дуьненан йукъаралло йехкина адамийн бакъонаш хьешарна а.
