Украинехь боьдучу тIамехь вийначу Оьрсийчоьнан Къилбера а, Къилбаседа Кавказера а кхин а 11 стагах къаьстина: Дагестанера пхиъ, Къилбаседа ХIирийчуьра а, Краснодар-махкара а шишша, цхьацца Адыгейра а, Астраханан кIоштара а.
Дагестанские Огни гIалара вахархо капитан Магомедов Исрафил кхалхарх хиира мехкан куьйгалхочун Меликов Сергейн телеграм-каналерчу, цунна Оьрсийчоьнан Турпалхо цIе йаларх зорбане яьккхинчу публикацица. Танкашна дуьхьал лелочу ракетийн Къилбан флотан бригадин командир вара Магомедов, пачхьалкхан информацин ТАСС агенталлин хаамашца, Херсонан кIоштахь вийна иза гIадужу-беттан 15-чохь.
ХIинжа-гIалара Магомедов Даниял валарх къаьстира "Дагестан" ГТРК-н цуьнан цIарах школехь парта схьайоьллуш йинчу репортажера. 23 шо долу Магомедов эскаран гIуллакх деш вара Смоленскан кIоштара Ельня гIаларчу 59-чу танкан полкехь, суьрта тIерачу цуьнан погонашка хьаьжча – лахарчу сержантан чинехь хилла иза, вийна зазадокху-беттан 25-чохь.
Дагестанан Казбекан кIоштан администрацино "ВКонтактерчу" шайн социалан машанехь дIахаийтира Украинехь веллачу меттигерчу шинан вахархочун – Абужанатов Имам-паша а, Даурбегов Ахьмад а- гергарчарна совгIаташ даларх. Царех лаьцна кхин сов дуьйцуш дац.
Дербентан официалан сайтехь бина хаам бу, гIадужу-беттан 8-чохь вийначу 21 шо долчу лахарчу сержантан Мирзоев Рашидан цIарах меттигерчу школан гIишло тIехь мемориалан у схьаделларх.
Къилбаседа ХIирийчоьнан информацин ресурсаша кIоштан администрацина тIетевжина хаамбо, лаамхочун статусехь Украинан тIелатарехь дакъалаьцна Моздокан кIоштара Предгорное эвлара 32 шо долу Умашев Амиран а, Моздокера 23 шо долу Сулаймонов Рустам а валарх.
Кубанера жигархочо Вотановский Виталийс шен "Титушки в Краснодаре" телеграм-каналехь зорбане даьхна, хетарехь, Украинехь беллачу эскархойн керла суьрташ.
Динскан кIоштан Новотитаровская станицера "Турпалхойн аллея" кешнашкахь дIавоьллина ву 47 шо долу Шинкарев Александр, иза кхелхина де – гIадужу-беттан 2-гIа ду. Коша тIехь – кочар ду тIехь бехчалг а йоцуш, иштта кочарш хуьлу "ЧВК Вагнера" тобанера йолахойн коша тIехь, иштта Бакинская станицера "ЧВК Вагнера" кешнашкахь а.
Динская станицан кешнашкахь дIавоьллина ву 19 шо долу Кожагельдиев Игорь – иза велла де – гIуран-беттан 2-гIа. Коша тIехь – сурт ду тIеман барзакъца, байракх ю тIеман символикаца.
Адыгейн Майкоп гIалин телеканало шайн "ВКонтактерчу" социалан машанан агIонехь зорбане яьккхина, вийначу гIалин вахархочун Нечаев Андрейн гергарчарна совгIаташ доькъуш публикаци.
Idel.Реалии сайто хаамбина, Астраханехь 31 шо долу эскархо Земцов Кирилл дIаволларх.
- Карарчу хенахь Кавказ.Реалиина хууш ю Оьрсийчоьнан Къилбера а, Къилбаседа Кавказера а кхалхар тIечIагIдинчу 1855 нехан цIерш. Зорбанашкарчу хаамех, Iедалан дIахьедарех, бакъоларйархойн а, тхайн хьасташкара а вовшахтоьхна хаамаш бу уьш. Баккъала долу эшамаш официалехь дийциначул а масехазза дукха хила мега.
- "Оьрсийн Би-би-си сервисо" а, "Медиазоно" а динчу зерашца, лахьан-беттан 25-хь долчу хьолаца, Украинехь кхелхинчу 93II оьрсийн эскархочух лаьцна хиина. "Би-би-си-н" зерашца, меттигерчу администрацийн а, зорбанийн а хаамаш кешнашкахь дIабоьхкинчу нахаца буьстича, билггал хууш долчу эшамашкахь беллачийн цIерш 40-60% кIезга хила тарло, баккъала а Оьрсийчохь дIабоьхкиначул а.
- Оьрсийчоьнан тIеман министралло шозза гIараяьккхира эшамех лаьцна информаци: Зазадоккху-беттан 2-хь дуьйцура 498 стеган кхалхарх, Зазадоккху-беттан 25-хь – 1 351 стеган. Гезгамашин-беттан 2I-чохь тIеман министро Шойгу Сергейс дIахьедира, 5937 стаг ву велларг аьлла. Украинхойн агIоно чIагIдо, оьрсийн эскаршна хилла эшамаш кхин а лакхара бу бохуш.
- Охан-беттан 20-хь хиира, Оьрсийчоьнан тIеман министралло Украинехь кхелхинчу эскархойн гергарчу нахах лаьцна хаамаш къайладахьа сацам бина хилар. Мангал-беттан 6-чохь "Городские порталы Shkulev Media Holding" машанаша вовшахтоьхна беллачех тептарера хаамаш пачхьалкхан къайленна юкъара бу, уьш баржорна бехктакхаман жоьпалла тIедожадо, нагахь санна, уьш йиллинчу хьасташкара схьаэцнехь а аьлла, тIечIагIдира Калининградехь кхело. Цул тIаьхьа цхьа могIа регионалан хаамийн гIирсаша, хьалхо шайн тептарш хIитточара, дIадехира уьш.
- Нальчик гIалин кхело мангал-беттан 17-чохь сацамбира, Украинерчу тIамехь байинчу Оьрсийчоьнан эскархойх хаамаш баржон украинхойн Оnline.ua хаамйин агIо дIакъовлуш сацамбарх.
- ГIуран-беттан 23-гIа де – Украинехь тIом боьду 303 де ду. Саратовн кIоштара Энгельс гIалара аэродромна цхьана беттачохь шолгIа тIелатар дина украинхойн дронца, кхелхина Оьрсийчоьнан кхо эскархо.
