Кадыровхоша Санкт-Петербургехь 26 шо долу нохчийн йоI Сулейманова Седа лачкъийначул тIаьхьа гIуллакх долийна стаг вер аьллачу Iедалан къепехула, къастийна кризисан "СК SOS" центран белхахоша. ЙоьIан гергарчара дIахьедина, иза йуха а цIера йеддера – оцу тIехула полицига хаам ца бинера шаьш аьлла.
ЧВК "Вагнеран" хилла кхо эзар йолахой "Ахмат" спецназе сехьабовларх дIахьедина нохчийн декъан командиро Алаудинов Аптис. Киевн хаамашца, «Ахмат» спецназ а, ЧВК «Вагнер» а гунахь йу Украинехь маьрша нах байъарна.
ГIийла бохкучу йуьртахоша туьканашкахь летийна декхарш дIало аьлла хьаькамашна тIедожийна Нохчийчоьнан куьйгалхочо. Джалкхера «декхарийн тептарш» дIакъовлуш Кадыров Ахьмадан цIарахчу фондера ахча делла. Оцу йукъанна Маршо Радионо дийцира оцу фонде бертаза ахчанаш дахкийтарх.
Дагестанехь а, Къилба-ХIирийчохь а белхан мигранташ толлуш, лоьцуш хиларна нехийн баьрзнаш гулделла. ХIинжа-ГIалахь нехийн оьланаш IаьIна даххаш дIакхоьхьу компанин белхалой «дIалецча». Нехаш дIайахьарца проблемаш хилира Москварчу «Крокус Сити Холлехь» теракт йинчул тIаьхьа рейдаш йолорна.
Подмосковьера «Крокус Сити Холлехь» теракт хиллачул тIаьхьа лаьцна хилла Нохчийчуьра Успанов Асхьаб велла полицин декъехь. ТIечIагIбазчу хаамашца иза велла тIехь къизаллаш лелийначул тIаьхьа. Успанов валарх тоьшалла дина Маршо Радио-на СПАРК системехь.
Оьрсийчоьнан лерринчу сервисаша дIахьедина Дагестанехь теракт кечйеш хиларна шеконашца кхо стаг лаьцна аьлла. ФСБ-но чIагIо йарехь, бехкехетарш дуьххьалдIа боьзна бу бохура "Крокус Сити Холлехь" динчу тIелатарца.
"Исламан пачхьалкхан" тобанан афганхойн гарано жоьпалла шайна тIелаьцна Подмосковьера "Крокус Сити Холл" концерташ хIитточу хIусамехь теракт йинчул тIаьхьа, тIеман аналитикаша а, политологаша а дIахьедира, Оьрсийчоьнан къайлахчу сервисийн аьтто бохарх.
Украинерчу тIамехь Гуьмсан кIоштара вийна верриг 51 стаг, дIахьедина меттигерчу Iедалша. Царна массарна а “Нохчийчоьнан турпалхочун” цIераш йелла. Махкара беллачех буьззина хаамаш бац – хьаькамаша уьш къайлахьо.
Украинехьа тIемаш бечу Ичкерин агIончаша дIахьедина Оьрсийчоьнан дозана тIехь "диверсин операцеш" йолорах. Оьрсийчоьнан дозана тIе шаьш довларх зазадокху-беттан 12-чохь дIахьедира Украинехьа тIемаш бечу "оьрсийн лаамхойн корпусо" а, "Сибирера батальоно" а.
Нохчийчоьнан Iедалхоша Украинерчу тIамана 31 млрд сов сом доьхкина - и терахь далийра зазадоккху-беттан 6-хь мехкан парламентан куьйгалхочо Даудов Мохьмада. Цо бахарехь, и ахча Кадыров Ахьмадан фондера дайъина. Стенгара долу Кадыровн фондана тIамана ахча – хууш дац, цо нийса хаамаш ца барна.
Къилба-ХIирийчоьнан бахархойн йуьхьйаьхна, бераша забаре видео йаккхарна –мобилизацица долу хьал беламе доккху роликехь. Видео йаржийначул тIаьхьа кхиазхошна кхерамаш тийсира, ткъа полицино талламаш болийра. Къилба-ХIирийчуьра мобилизаци йинчара хьалхо латкъамаш бира герз а, барзакъ а дац бохуш.
Хьажа кхин дIа а
