Гуьржийчоьнан 69 процент бахархоша Орсийчоь шайн пачхьалкхан мостагI лору. Цуьнан тоьшалло до "Кавказан барометр 2024" талламан гурашкахь бинчу хаттаман жамIаша, йаздо Маршо Радион оьрсийн сервисо.
И гайтам шо шаре кхуьуш бу: 2021-чу шарахь бинчу оцу кепарчу талламехь корта мостагI лорура Оьрсийчоь 66%. 2018-чу шарахь – 49%, 2017-чу шарахь – 40%, ткъа 2012-чу шарахь – 35%.
Американ Цхьаьнатоьхна Штаташ коьрта мостагI лерина 4% респонденаша, ткъа Туркйчоь – 2%.
Вукху агIор, Гуьржийчоьнан коьрта доттагI Америка йу аьлла хета хеттарш динчу 24% гуьржашна. ШолгIачу меттигехь йу Азербайджан – 8%, Украина-7%. Кхин дIа йазйина йу Туркойчоь, Германи, Эрмалойчоь. Оьрсийчоь Гуьржийчоьнан доттагI лерина кавказхойн мехкан 2 проценто.
Оцу йукъанна хеттарш дина 26 процент тешна бу, Гуьржийчоьнан доттагIий бан а бац аьлла.
Хаттам бина охан-беттан 16-чуьра стигалкъекъа-беттан 13-чу ийне кхаччалц Гуьржийчоьнан дозана тIехь интервьюш а оьцуш. Шаьш суверентитет йолу мехкаш ду аьлла дIакхайкхийначу Абхазихь а, Къилба ХIирийчохь а талламаш бина бац.
Верриг а хеттарш динарг ву 1509 стаг, ишта кегий къаьмнаш дехачу Самцхе-Джавахетихь а, цигахь бехаш бу эрмалой а, дукхахеберш азербайджанхой болчу Квемо Картлихь а. Гуьржийн, эрмалойн, азербайдажанхойн меттанашкахь дIабаьхьна бу хаттам.
